وطن

يا صاحبي يا صديقي
يا مسلم يا مسيحي
هتقدر معايا نحمى
اللى باقى م الوطن
هتقدر تأخذ بأيدى
ونعدى فوق كل المحن
هتقدر تمسك بكتفى
تنتشلنى قبل ماتحرقنى الفتن
هتقدر تحوطنى بحضنك
وتغطي بقميصك لحمى

قبل م العار
بشرفى وشرفك يقترن
هتقدر تنسينى همومى
وتمسح دمعة. سالت من عيونى
وتضحكنى بنكتة
وإلا هتسيبنى أهرب لوحدي
وأحاول أنسي كلمة صديقى
واحاول أنسي
انى كان ليا وطن

كلامى مش لواحد بعينه

ياللى زرعت وسط غيطان المحبة
عيدان العدا
وبدل ما تبدر بذور الأمل غرست العند
ورويت بذور الأنا
ياللى خلعت بالجبروت سنابل على خدها
حب الندي
وحصدت بإيد الغدر قبل الأوان ورد الجناين
فى الخفا
ياللى قطفت ثمرة فؤاد الوطن
قاصد ام بالخطا
وحفرت قبر أخوك بأيدك وحسبته
أمر وقضا
ياللى بورت ارض الجدود لما رويته بدم
وجرفت طمى العهود قبل الوفا
يالى خيالك بنى لك جسور بطول المدى
وحفر قنايا يجري فيها نيل دم وبكا

كلامى مش لواحد بعينه
كلامى ابثه للملا
كلامى للى واقف على سجادة الصلا
وللى رافع راية بلاده فى الطلا
وللى مندس جوانا بلا خشى ولا حيا
وللى كلامه متغمس بسم وبيقول بالهنا
وللى ضميره مات من زمن واتنسي
وللى فاكر نفسه ياما هناك ياماهنا
وهوحتة فار فى سوق النخاسة ما يتشري

كلامى مش لواحد بعينه
كلامى بعلو الصوت ورجع الصدى
لودامت لغيرك كانت تدوملك
فوء واحسب حساب خطوتك
اليوم قبل الغدا

حسبى الله ونعم الوكيل
اشكي اليه ضعفى
 وابث همي فى الدعا
مالى رب سواه
على القلوب مطلع
ويعلم خفى الصدور
وكل قصد ومانوى