لما الاقى الدنيا من حواليا فاضية
رغم انى فى وسط ناسي
والأماكن الرحبة خانقة
كل انفاسي وكيانى
والمشاعر جوايا فاترة
ومافيش راحة نهائى
والساعات بتمر واقفة
شايلة اكبر هم فى حياتى
وقلبي يبتدي دق
ومش دق عادى
وابتدى اتكور جوا ذاتى
واشغل روحى بأى شيء
يلتهم كل وقتى
وبرضه ماالاقيش مفر
الا ذكرياتى
والدموع قبل الكلام تحكى
ايه قالب حياتى
وابتدى احكى كل اللى فى نفسي
بس مش لأى حد
لكن لأغلى انسانة فى حياتى
ماما نفسي اقولها فى وجودك
ماما نفسي اسمع رد صوتك
ماما نفسي اجيب لك هدية
تبقى اد الدنيا ديا
اد احلامى فى غيابك
نفسي فى حضنك انام
ولا عمرى اشبع م الحنان
نفسي ااقول رايحة لماما
لما اغضب من ولادى
وتقوليلى سامحى يا منمن
الأمومة مش شيء عادى
نفسى لما اتخانق اقدر ازعل واجيلك
وتقوليلى ارجعى بيتك ملاذك
نفسي اشكى من اي حد واى حاجة
واسمع عتابك او ملامك
نفسي لما افرح تبقى جنبى
ولما ازعل تبقى سندى
نفسى اشوفك مش فى صورة
شيء حقيقى مش خيالى
نفسي نفسي ياما فى نفسي
يالى عمرك عنى ما غيبتى
ولا هتغيبى من حياتى
نفسي اقول ماما عندى
غرقانة معاها لشوشتى
نفسي اكفر عن ذنوبى
واسمع سامحتك من فؤادك
يومها يبقى السعد جالى
وعمره من عندى ما يمشي
مش باقولك مهما العمر عدا
لسه طفلة من يوم غيابك
لسه حافظة لون عيونك
لسه مستنية رجوعك
لسه عايشة فى وجودك
لو حتى كل العمر فات
نفسي تتباهى ببنتك
واسمع صوت دعاكى يدفى قلبى
نفسي تزعلى منى واصالحك
واخاصمك لما عنى تغيبى
وتقوليلى مين مفروض يشأر
الكبير والا الصغير
نفسي لما تشوفى الشعر الأبيض تحت الحجاب
تقوليلى مهما كبرتى انت حيلتى انت صغيرتى
لو حتى كل الشعر شاب
عارفة امتى الشعر شاب؟؟؟
من يوم عنى ما غيبتى
اه يا مامتى
ياما كتير فى نفسي
بس تعرفى حقيقى بجد
ايه اكتر حاجة فى نفسي
نفسي ااقولك يا ماما
ليست هناك تعليقات:
إرسال تعليق