امى..ماما .. ست الحبايب

سنين طويلة عدت عليا من يوم فراقك
عمر اكتر م العمر اللى عشته معاكى
لو حسبته مليون الف مرة
هاغلط وارجع اعده من تانى
مش لأنى ماباعرفش اعد
او لأنى هريته عد
ده لأنى من بعدك ف الدنيا تهت

مهما يمر العمر يوم ورا يوم
ومهما فى كل يوم ..اقابل م الحبايب كوم
ومهما ينادينى ولادى ماما ..يا احلى ما فى الكون
ومهما يجيبولى الهدايا على كل شكل ولون
ومهما فرحت ومهما عشقت ومهما عديت صعاب ونجحت
مهما كبرت ومهما دعيت ربى ومن رضاه نلت
مهما ومهما ومهما........

عندى جوايا فى قلبى وجعة
ومتحجرة جوايا فى عينى دمعة
وحاسة يا اما انى مخنوقة
وجوا حلقى غصة
واكيد بهمى انت حاسة بكل همسة

عارفة لأنى من بعدك بطلت اقول ماما
و انى من بعدك لاليا طول ولا هامة
وعارفة انى باخاف اقول عليك ذكرى
لأنك عايشة جوايا.. معايا ..فى كل خطوة وفكرة