اللى يقول الحق

قلتلهم عايزنى اقعد معاكم

تسيبونى اقول كل اللى فى نفسى

لا غلط ولاصح ولاده كلام

مايقولوش عاقل ولا حد من سنى

من يومى صريحة .. اللى فى قلبى

عل لسانى حكمة سمعاها من امى

الحال النهارة يغم

والناس ماشية فى الشوارع تشكى

والدموع فى العيون متحجرة ..حالفة ما تنزلشى

والكلام على طرف اللسان معقود

عارفين انه لو اتقال ما هيفدشى

الدنيا ماشية مقلوبة كأنها على راسها بتمشى

وان اتعدلت على رجلها..الأرض ما هتطولشى

لا الكلام فى السياسة عاجب

ولا فى السكوت عنه الغل هيشفى

وفى الأكل والشرب البطون جاعت

والأيادى اتمدت والهوي ما بيشبعشى

وفى الكورة الناس قالوا نطلع همنا

لقيوا فى الملاعب عرايس خشب ما بتتحركشى

وعايزنى اكون زيهم شيطان ما بيقولشى

اكتم مشاعرى واخرس لسانى واقول لنفسى

اللى يقولك هش ..جوا هدومك كشى وانحشرى

وانا اللى عمر لسانى ما سكت عن الحق

وفى سيرة الناس لا عاب ولا اغتبشى

عارفين..اصل الحكاية ..انى خايفة من يوم

فيه هاقف أُدام اللى خالقنى.. هايبة .. خايفة

وانا اللى فى الدنيا قال ايه قوية ما بتخافشى

واقوله يا رب

سكت ع الغلط وكتمت الحق

وعملت نفسى عامية ما بتشوفشى

اصلى لما جيت اتكلم واقول

ده صح وده ما يصحش

أصحابى وقفولى..قالولى هس

دى الأيد لوحدها ما بتسقفشى

اسفة ..يا صحابى..القعدة معاكم

لا العمر هتطول .. وما بتقصرشى

اقعد لوحدى .. واقول لنفسى

ده ينفع .. وده ما ينفغشى

افضل ما اكتم فى قلبى واموت بغيظى

اصل الموت لما بيجى ما بيفرقشى

واقف أُدام ربي بنفس رضية

أفضل ما اقف خايفة وضعيفة عشان فكرت

اخرس لسانى ولا ينطقشى

يا ناس ..ده اللى يقول الحق عمره ما بيغلطشى